La Bienal Climática: arte, industria y territoriu ye una iniciativa artística que da vida a un espaciu públicu inspirador y afayadizu pa qu’instituciones, comunidaes y persones puedan reflexonar y actuar xuntes sobre los retos de la sociedá contemporánea. Más qu’un eventu, la Bienal Climática concíbese como una plataforma d’alcuentru, esperimentación y incubación d’idees dende la qu’ensayar formes nueves de rellación ente cultura, industria, territoriu y vida cotidiana.
Al traviés del arte y otres formes de cultura, la Bienal Climática trata’l clima tanto na so dimensión medioambiental como na so dimensión social, activando espacios de converxencia, esplorando lo que, de mano, paez malo de llograr y xenerando una escena d’escenes: una constelación d’espacios de diálogu p’activar procesos d’averamientu y concordia ente persones y organizaciones de procedencia bien variada. La Bienal quier axuntar y celebrar la diversidá ideolóxica, xeneracional y social pa encarar los retos del nuestru tiempu.
Alianza interinstitucional
La Bienal Climática: arte, industria y territoriu naz con vocación de continuidá y d’apertura. Nun ta pensada pa ser esclusiva d’un sector, d’una disciplina o d’una sensibilidá política concreta. Ye un espaciu públicu y permeable, dispuestu a dexase tresformar polos que lu habiten.
Naz como frutu d’una alianza interinstitucional integrada pol Ministeriu pa la Transición Ecolóxica y el Retu Demográficu, el Ministeriu de Cultura, el Ministeriu de Vivienda y Axenda Urbana, el Principáu d’Asturies, el Conceyu d’Avilés y la Fundación Atelier itd. Tien, amás, el sofitu d’instituciones privaes y filantrópiques como la Fundación Daniel & Nina Carasso y el Community Arts Lab de Porticus, y permanez abierta a la incorporación d’entidaes nueves que quieran ayudar, acompañar y facer medrar esti proyectu dende ámbitos variaos.
Mapa de zones de interés n’Avilés, 2024
Imaxe: Elisa Cuesta
¿De qué falamos cuando falamos de clima?
Reflexonar sobre’l clima, en toles sos dimensiones, implica poner atención a lo que non siempre apaez nos datos: les memories industriales d’un llugar, los barrios en tresformación, les formes de cooperación cotidiana, los mieos y les espectatives colectives. Ye reconocer que la transición ecolóxica nun ye namás tecnolóxica o científica, sinón tamién cultural, afectiva y institucional.
Falamos de crisis climática pa nomar tanto una crisis ambiental, marcada pol calentamientu global, la degradación de los ecosistemes y la perda de biodiversidá; como una crisis social, travesada pola polarización, el deterioru de los vínculos y l’ausencia de marcos compartíos. Dende esta realidá surde la Bienal Climática: un espaciu qu’encara’l clima dende la complexidá, ensin simplificaciones nin conseñes.
Xunto al ruíu y la polarización qu’apoderen el debate públicu, conviven práctiques cotidianes de cooperación qu’escasamente ocupen el centru del rellatu: persones que cultiven, curien, investiguen, reparen o creen en comuña.
La Bienal Climática: arte, industria y territoriu amplifica estes esperiencies, conectando nodos cívicos y afectivos que quieran ampliar la capacidá d’entendimientu y collaboración que tenemos los seres humanos. Pa eso, al traviés del arte abre un campu de posibilidaes: práctiques, imaxinarios y maneres de vida que surden del presente y proyecten formes nueves d’habitar xuntes/os el mundu.
Énte un contestu global d’emerxencia ambiental, aumentu de les desigualdaes y radicalización de los discursos d’odiu y polarización, ¿qué utopíes podemos ensayar entá güei? La Bienal Climática céntrase na emerxencia climática y propón trabayar dende la idea de que la utopía nun ye un horizonte alloñáu a futuru sinón una práctica posible nel presente, reivindicando’l papel del arte nesti procesu.
Un modelu nuevu
de bienal
Camín d’una práctica sostenible
Sabedora de los desafíos qu’encaren les bienales, la Bienal Climática revisa les sos práctiques de gobernanza, comisariáu y producción, integrando la sostenibilidá como principiu cultural.
Les bienales, anque seyan espacios de pensamientu críticu, a menudo reproducen dinámiques insostenibles de producción, movilidá y gobernanza. Dende esa reconocencia, la Bienal Climática asume’l retu de revisar les sos maneres de facer, producir, comisariar y collaborar.
Xunto a Julie’s Bicycle y Smart & Cities, la Bienal Climática desenvuelve una política integral de sostenibilidá, non como un manual zarráu de sofitu sinón como una ferramienta central que se caltién abierta y en construcción. En cuenta de dase de forma aislada, esta construcción d’una práctica sostenible propónse tamién como un elementu de collaboración. Por eso, la Bienal Climática: arte, industria y territoriu impulsa y participa en redes de trabayu europees y internacionales de bienales coles qu’ensaya eses otres formes de facer. A la fin, concibe la sostenibilidá non solo como un asuntu técnicu o temáticu, sinón como una cuestión cultural: la posibilidá d’imaxinar otres maneres d’organización colectiva.
Nomadismu asitiáu
Llinies de trabayu
La Bienal Climática: arte, industria y territoriu estructúrase en delles llinies de trabayu interrellacionaes.
Un programa de residencies artístiques conecta arte, ciencia y instituciones públiques pa impulsar la investigación interdisciplinar y el pensamientu aplicáu. Estes residencies desenvuélvense xunto a organismos como l’Axencia Estatal de Meteoroloxía o la Fundación CIUDEN o la Factoría Cultural d’Avilés.
La llinia espositiva concíbese como un espaciu pa cultivar los imaxinarios de la transición ecolóxica, activando sitios simbólicos variaos del territoriu y favoreciendo una reflexón sensible y en conexón col contestu global.
Surdida d’un procesu de mediación cultural con organizaciones locales, En Colectivu ye la llinia de trabayu qu’acompaña práctiques comunitaries que yá tán ensayando formes de vida sostenibles, cola mira de fortaleceles y texer redes ente elles.
Centrada nel prototipáu, la llinia de trabayu d’espacios y equipamientos públicos ensaya la tresformación d’estos espacios como sitios d’adaptación y deprendimientu climáticu.
La llinia d’arte+educación propónse como un campu d’esperimentación onde los llinguaxes artísticos vuélvense ferramientes pa pensar el presente y imaxinar otres formes de tar en mundu. Dende’l trabayu siguíu con escueles locales propón aprender dende’l facer y en contactu col territoriu.
Acompasando tou esti treme, el programa públicu de la Bienal Climática propón una serie d’alcuentros dende los que caltener el diálogu y el disensu: sitios pa pensar dende la complexidá y facelo coles ferramientes sensibles que l’arte ufierta. Al traviés de micro-teatru, proyecciones de cine, performances, conciertos o charles, el programa públicu de la bienal quier ampliar el so algame a públicos inesperaos.
