Sobre la Bienal Climática

Bienal Climática: arte, industria y territoriu

La Bienal Climática ye un espaciu d’alcuentru abiertu a la ciudadanía. Amás de ser un eventu cultural con un programa espositivu ampliu, la bienal concíbese como un espaciu pal alcuentru y el diálogu.

Equí, la pallabra «clima» va acullá del clima atmosféricu. Tamién se refier al clima social nel que vivimos, a cómo convivimos, trabayamos y nos rellacionamos.

Dende esa mirada amplia, la bienal axunta a persones y organizaciones variaes pa reflexonar, al traviés del arte, la cultura y el paisaxe, sobre cuestiones que nos afecten a toos, como l’emplegu del futuru, la rellación ente lo rural y lo urbano o la convivencia democrática.

Organizaciones impulsores

La Bienal Climática: arte, industria y territoriu naz como frutu d’una alianza ente delles instituciones, impulsada pol Ministeriu pa la Transición Ecolóxica y el Retu Demográficu, el Ministeriu de Cultura, el Ministeriu de Vivienda y Axenda Urbana, el Principáu d’Asturies, el Conceyu d’Avilés y la Fundación Atelier itd. Cunta tamién col sofitu de la Fundación Daniel y Nina Carasso y el Community Arts Lab by Porticus.

COL SOFITU DE

COL SOFITU DE

Característiques de la bienal

Hai trés característiques que definen l’espíritu de la Bienal Climática:

La cultura y l’arte

Pola so capacidá pa favorecer l’acercamientu y el diálogu en condiciones de tranquilidá y creatividá. Esto esprésase al traviés del so programa espositivu y el so programa públicu.

Abelardo Gil-Fournier, Hacendera. 2023. Fotografía de Juan Baraja

La collaboración y el trabayu en rede

Pol so impulsu y orixe. L’impulsu institucional vien d’alministraciones públiques col sofitu de delles fundaciones. El programa públicu cunta cola participación d’empreses industriales y organizaciones sociales.

Álex Galán, La cabaña que quería ser bosque. Rodaje, 2026 — ÁlexGalán, La cabaña que quería ser bosque. Rodaje, 2026

El territoriu y la importancia que s’otorga al sitiu onde se celebra

Pola so inspiración nel estudiu fondu del territoriu. La bienal cunta cola participación d’artistes y creadores locales. Nos debates que van tener llugar nella, Avilés va ser exemplu y metáfora de tresformaciones y retos de la nuestra sociedá.

Programa espositivu

La Bienal Climática despliega un modelu espositivu qu’activa espacios emblemáticos del territoriu y dialoga coles sos histories, usos y comunidaes actuales. Acullá de los formatos museísticos convencionales, les esposiciones distribúyense n’arquitectures y infraestructures singulares pa pensar, dende elles, les tresformaciones ecosociales del presente.

Programa públicu

El programa públicu de la Bienal Climática impulsa espacios de conversación, deliberación y escucha inspiraos nes obres y artistes participantes. Propón imaxinar posibilidaes futures, fomentar el diálogu ente perspectives diverses y ensayar formatos participativos que favorezan la convivencia nel desalcuerdu, alloñándose de la polarización y promoviendo un espaciu cívicu compartíu.

Investigación

La Bienal Climática nun se plantega namás como un eventu espositivu, sinón como un procesu d’investigación, producción y tresformación sosteníu nel tiempu. Más allá de la temporalidá bienal, impulsa programes y llinies de trabayu que dexen desenvolver formes de collaboración duraderes ente arte, arquitectura, ciencia, instituciones y ciudadanía. Estes iniciatives abren preguntes sobre qué permanez primero y depués d’una bienal, cómo se producen les obres y qué tipos de legáu —material, institucional, social o territorial— pue activar un proyectu cultural nel contestu de la transición ecosocial.

Colección Estatal d’Arte y Clima

Impulsada pol Ministeriu pa la Transición Ecolóxica y el Retu Demográficu (MITECO), la Colección Estatal d’Arte y Clima ye’l corazón de la Bienal Climática. Naz gracies a lo colaboración ente’l MITECO y el Ministeriu de Cultura, y enmárcase dientro del programa del 2 % Cultural: una iniciativa pública que destina parte de la inversión del Estáu a protexer y arriquecer el patrimoniu históricu, artísticu y cultural n’España. Cada edición y propuesta comisarial de la Bienal Climática contribuye a construyir la colección y, al empar, la colección orienta y da sentíu a les esposiciones nun diálogu continuu. El patrimoniu entiéndese asina como una realidá viva, en tresformación constante y vinculada a los desafíos ecosociales actuales.

Residencies ACTS

El programa de residencies ACTS (Arte, Ciencia, Tecnoloxía y Sociedá) abre un espaciu d’investigación y collaboración interdisciplinar pa encarar la complexidá de la transición ecolóxica dende l’encruz ente práctica artística, conocimientu científiua, tecnoloxía y instituciones públiques. Al traviés d’estos programes, la Bienal Climática impulsa contestos de trabayu onde artistes, investigadores, personal técnico y axentes institucionales comparten procesos, metodoloxíes y infraestructures, esplorando formes nueves d’entender y narrar los cambeos ecosociales. Desenvueltes xunto a organismos como l’Axencia Estatal de Meteoroloxía (AEMET), la Fundación Ciudad de la Energía (CIUDEN) o la Factoría Cultural d’Avilés, les residencies articúlense alredor d’ámbitos como la meteoroloxía, la transición enerxética o les tresformaciones industriales y dixitales. Estos procesos d’investigación culminen n’obres de producción nueva que, en dellos casos, pasen a formar parte de la Colección Estatal d’Arte y Clima del MITECO.

Arquitectures Comunes

una llinia d’investigación de la Bienal Climática qu’esplora cómo los espacios y equipamientos públicos pueden convertise en llugares d’aprendimientu, convivencia y adaptación frente a la emerxencia ecosocial. La propuesta parte d’entender que biblioteques, parques, mercaos o centros cívicos pueden desempeñar un papel fundamental na construcción de formes nueves de rellación ente ciudadanía, instituciones y territoriu.

Los equipamientos públicos entiéndense asina non como espacios de serviciu, sinón como ecosistemes vivos onde arte, arquitectura y distintos saberes enxaréyense pa ensayar otres maneres d’habitar. Al traviés de procesos asitiaos d’investigación y esperimentación, esta llinia busca activar estos espacios como infraestructures sociales y ambientales capaces de responder a los desafíos del presente.

Actividaes y esposiciones en diálogu

La Bienal Climática entra tamién en diálogu con actividaes, esposiciones y proyectos desenvueltos de forma independiente por instituciones, espacios y axentes culturales que quieran sumase a esti marcu de reflexón y acción colectiva. Al traviés d’estes collaboraciones, la Bienal amplía’l so algame y favorez una rede d’iniciatives conectaes por esmoliciones ecosociales compartíes.