Camín que güei se conoz pela ruta que lleva escontra’l llagu, pero que n’otres dómines la xente percorría colos granos maduros pa llevalos a moler. Esti molín ye un exemplu tovía vivu de cómo les vieyes costumes dexaron a les comunidaes locales aprovechar los recursos de manera sostenible, daqué de lo qu’inda podemos aprender güei.

La idea de proponer estes visites dende la Bienal Climática naz de la collaboración que se dio ente Guillermina, Luis y la Escuela de Teitáu p’ayudar a reparar delles pieces del molín estropiaes por una riada. Dada la guapura desconocida d’esti llugar y lo especial de la so historia, la escuela filó xunto a Guillermina la idea d’organizar visites nel contestu de la Bienal Climática pa visibilizalu, dignificalu y aprecialu como merez. Ye tamién una ocasión pa celebrar que’l molín vuelve moler.

Organiza: Escuela de Teitao , Molín del Auteiro