Abierta la convocatoria de residencies artístiques na Factoría Cultural d’Avilés en collaboración cola Bienal Climática
La Factoría Cultural d’Avilés abre la so convocatoria anual d’ayudes a la producción artística, en collaboración cola Bienal Climática (Avilés, 2026). Una invitación a artistes locales, nacionales y internacionales a desenvolver proyectos en residencia qu’analicen, dende l’arte contemporaneu, los desafíos culturales, sociales y ecolóxicos del nuestru tiempu.
MODALIDAES DE LA CONVOCATORIA
La convocatoria ta destinada a artistes mayores de 18 años —individualmente o en colectivu— qu’acreíten como mínimu dos años de trayectoria y que la so práctica s’incluya en disciplines como les artes plástiques, visuales, escéniques, lliteraries o audiovisuales. La convocatoria contempla trés modalidaes de participación:
- Modalidá A: Hasta seis ayudes pa persones físiques o colectivos (máximu cuatro integrantes), nacíos o empadronaos n’Asturies.
- Modalidá B: Una ayuda destinada a persones físiques del ámbitu nacional (residentes n’España, sacante Asturies), que va incluyir agospiamientu.
- Modalidá C: Una ayuda destinada a artistes internacionales (residentes n’España o nel estranxeru, non empadronaos n’Asturies), tamién con agospiamientu incluyíu.
Cada ayuda ta dotada con 2.000 € y, nos casos nacional y internacional, agospiamientu incluyíu na residencia municipal. Los proyectos han desenvolvese nel 2025 y rematar primero del 15 d’avientu. Como parte del procesu, les persones escoyíes van participar nuna actividá de retornu abierta al públicu (taller, charla, clas maxistral, etc.) y van presentar públicamente’l so trabayu dientro de la programación de la Bienal Climática nel 2026.
UNA RESIDENCIA EN DIÁLOGU COL TERRITORIU Y EL CAMBÉU CLIMÁTICU
La Factoría Cultural, no que yera una fábrica de camises, conviértese, una vez más, n’espaciu de creación, convivencia y intercambéu ente artistes. Anguaño, amás, la convocatoria enmárcase nuna collaboración especial cola Bienal Climática, un eventu pioneru que busca visibilizar y fomentar propuestes artístiques centraes na crisis climática, la sostenibilidá y la resiliencia ambiental.
Como parte del marcu de collaboración cola Bienal Climática, van valorase sobre manera aquelles propuestes que se vinculen coles sos trés exes temátiques —la industria del futuru, el mundu rural y los saberes vernáculos y l’alimentación— y que dialoguen col heriedu industrial de la mesma Factoría Cultural
Plazu de solicitúes: del 1 al 16 de xunetu del 2025 (15 díes naturales dende la publicación nel BOPA).
Para más información o consultes: cmartinezt@aviles.es
Pa presentar la solicitú online: puedes facelo al traviés de la sede electrónica. Cola indicación pa incorporar al Espediente: AYT/874/2025.
Pa presentar la solicitú presencial: les solicitúes, acompañaes de la documentación correspondiente, cola indicación pa incorporar al Espediente: AYT/874/2025, habrán presentase na Oficina d’Asistencia en materia de Rexistru del Conceyu d’Avilés, sita na Plaza d’España, númb. 1, 33401, Avilés.
