La Bienal Climática inaugura n’Avilés 100 díes
La Bienal Climática inauguró güei la so 1. er edición n’Avilés con un actu institucional que marca l’empizu d’una programación que, col lema Ensayar lo inesperao, va tresformar la ciudá y la so redolada nun referente cultural hasta’l próximu 20 de setiembre.
Inauguración Bienal Climática_Créditos: Nico Rodríguez-1
La inauguración oficial tuvo llugar esta mañana nel Parque Ferrera d’Avilés cola presencia del ministru de Cultura, Ernest Urtasun; el subsecretariu del Ministeriu pa la Transición Ecolóxica y el Retu Demográficu, Miguel González Suela; la directora xeneral d’Axenda Urbana y Arquitectura del Ministeriu de Vivienda y Axenda Urbana, Maite Verdú Martínez; el secretariu d’Estáu de Cultura, Jordi Martí Grau; la conseyera de Cultura, Política Llingüística y Deporte del Principáu d’Asturies, Vanessa Gutiérrez; y l’alcaldesa d’Avilés, Mariví Monteserín. Tamién tuvieron presentes el director d'Atelier itd, Miguel Soberón; la directora artística de la Bienal Climática, Amanda Masha Caminals.
Nes sos intervenciones, los representantes institucionales destacaron la capacidá de la cultura pa xenerar espacios d’alcuentru, diálogu y innovación frente a los retos climáticos contemporáneos, amás del papel d’Avilés y Asturies como territorios clave pa reflexonar sobre les tresformaciones industriales, sociales y medioambientales del presente.
Hasta’l próximu 20 de setiembre, la Bienal va axuntar a más de 40 artistes y colectivos nacionales y internacionales nuna propuesta qu’enxareya arte contemporaneu, pensamientu críticu, participación ciudadana, memoria y innovación pa reflexonar sobre los grandes desafíos ecolóxicos, sociales y culturales del nuestru tiempu.
Inauguración Bienal Climática_Créditos: Nico Rodríguez-2
Más de 40 artistes pa ensayar futuros posibles
La programación artística de la Bienal Climática, comisariada por Amanda Masha Caminals, articúlase alredor de trés grandes exes temátiques: Estación Méteo, que se dedica a formes nueves de mirar y comunicar lo atmosférico; Industrias presentes, centráu nos imaxinarios de la transición industrial y enerxética; y Duelos y Allegríes, enfocáu nes dimensiones emocionales, sociales y culturales de les tresformaciones contemporánees. La Bienal axunta a más de 40 artistes y colectivos nacionales y internacionales, ente ellos Lawrence Abu Hamdan, Gabriela Bettini, Carolina Caycedo, Agnes Essonti, Naiza Khan, Otobong Nkanga o Amanda Piña, y incorpora amás proyectos de mediación cultural y trabayu comunitariu desenvueltos xunto a organizaciones del territoriu dientro de la iniciativa En colectivo.
El programa combina obres históriques, préstamos institucionales, trabayos en procesu y producciones nueves creaes específicamente pa esta edición. En total, la Bienal impulsa 14 producciones nueves. Ente les sos iniciatives destaquen la presentación d’una selección de la Colección Estatal d’Arte y Clima, impulsada pol Ministeriu pa la Transición Ecolóxica y el Retu Demográficu y el Ministeriu de Cultura, amás del programa de residencies ACTS (Arte, Ciencia, Tecnoloxía y Sociedá), desenvueltu xunto a instituciones como AEMET, CIUDEN y la Factoría Cultural d’Avilés pa fomentar formes nueves d’investigación y creación alredor de la transición ecolóxica.
Inauguración Bienal Climática_Créditos: Nico Rodríguez-3
Trece espacios pa percorrer la ciudá dende l’arte, la industria y el territoriu
La Bienal Climática va esplegase en 13 espacios distribuyíos per Avilés y la so redolada, configurando un percorríu que conecta patrimoniu históricu, memoria industrial, equipamientos culturales y espacios públicos. La programación va tener llugar n’enclaves emblemáticos como los palacios de Camposagrado y Valdecarzana, La Grapa, La Curtidora, el Centru Niemeyer, el Campus d’España de la Universidá ArcelorMittal, el CMAE, la Biblioteca de La Luz, la Factoría Cultural o La Noria, ente más otros. Esta rede d’espacios tresforma la ciudá nun llaboratoriu cultural espandíu onde arte contemporaneu, industria, territoriu y ciudadanía dialoguen pa imaxinar formes nueves d’encarar los desafíos del presente y del futuru.
Inauguración Bienal Climática_Créditos: Nico Rodríguez-6
Un programa públicu de más de 60 actividaes pa conectar arte, industria y territoriu cola ciudadanía
La Bienal Climática complétase con un programa públicu ampliu de más de 60 actividaes, dirixíu por Atelier itd y l’Asociación El Día Después, que propón percorríos por paisaxes industriales y naturales, talleres participativos, debates, instalaciones, acciones performatives y proyectos que conecten arte, ciencia, ecoloxía y ciudadanía. Ente les propuestes destaquen les Derivas de la Cartografía Crítica, itinerarios qu’esploren la memoria industrial y les tresformaciones urbanes d’Avilés; intervenciones artístiques como El banquete de las doncellas, d’Agnes Essonti, Florecimiento, d’Amanda Piña, o Nube Móvil, de Rotor Studio; amás de dellos llaboratorios ciudadanos orientaos a imaxinar colectivamente futuros enerxéticos, sociales y ambientales.
La programación pon amás una atención especial nel patrimoniu, la cultura popular y los saberes locales asturianos al traviés d’actividaes vinculaes a la memoria rural, l’arquitectura tradicional, la oralidá y les práctiques comunitaries. A eso súmase la llinia d’investigación Arquitecturas Comunes, qu’esplora cómo equipamientos públicos como biblioteques, parques o centros cívicos pueden convertise n’espacios de convivencia, aprendimientu y adaptación frente a los retos ecosociales, con proyectos como Bibliokepos, desenvueltu na Biblioteca de La Luz d’Avilés xunto a comunidaes y axentes locales.
Inauguración Bienal Climática_Créditos: Nico Rodríguez-13
Una rede d’esposiciones y proyectos p’ampliar el diálogu
La Bienal Climática amplía’l so algame per aciu collaboraciones con instituciones y axentes culturales que desenvuelven esposiciones y proyectos alliniaos coles sos esmoliciones ecosociales. Ente les iniciatives asociaes destaquen la muestra ¡Aquí hay petróleo!, impulsada pola Fundación Biodiversidá y el Círculu de Belles Artes; les itinerancias promovíes pol Ministeriu de Vivienda y Axenda Urbana; les esposiciones What Darwin Missed. Lo que Darwin pasó por alto, de Joan Fontcuberta, Agua, de Edward Burtynsky, y Naturalezas Vivas, nel Centru Niemeyer; amás de la llegada a Avilés de la XVII Bienal Española d’Arquitectura y Urbanismu (BEAU), que reflexona sobre los fluxos de materiales, enerxía, persones, datos y mediu ambiente que configuren la sociedá contemporánea.
La Bienal Climática: arte, industria y territoriu ta impulsada pol Ministeriu pa la Transición Ecolóxica y el Retu Demográficu, el Ministeriu de Cultura, el Ministeriu de Vivienda y Axenda Urbana, el Principáu d’Asturies, el Conceyu d’Avilés y la Fundación Atelier itd. Cunta tamién col sofitu de la Fundación Daniel y Nina Carasso y el Community Arts Lab by Porticus.
