1.er edición Bienal Climática anuncia les sos feches y títulu: Ensayar lo inesperao
La Bienal Climática: arte, industria y territoriu va celebrar la so primer edición del 12 de xunu al 20 de setiembre del 2026 n’Avilés, Asturies, col títulu Ensayar lo inesperao. Esti nome reflexa la filosofía de la bienal: esplorar los momentos de transición y cambéu onde lo que paecía estable dexa de selo, y el futuru tovía nun pue definise a les clares.
La directora artística, Amanda Masha Caminals, esplica: “Ensayar lo inesperao propón aceptar la incertidume como terrén d’acción, ensin resignase a esperar la catástrofe. La Bienal concibe l’arte como guía de pasu, capaz d’abrir preguntes, señalar problemes y proponer maneres sensibles de movese n’escenarios onde nun existen mapes definitivos”.
Por más de trés meses, Avilés va tresformase nun escenariu abiertu a esposiciones, alcuentros, talleres y acciones performatives que conecten arte, industria y territoriu. La primer edición va desenvolvese en diverses sedes espositives y espacios públicos, incluyendo proyectos d’arquitectura participativa, programes educativos y actividaes comunitaries, convidando a esperimentar formes nueves de convivencia y curiáu frente a los retos ambientales y sociales.
Testu curatorial y conceptualización del títulu de la 1.er edición
Ensayar lo inesperao
Les sociedaes nun cambien siguiendo trayectories clares o percorríos únicos. Les tresformaciones fonderes —ecolóxiques, sociales, tecnolóxiques, culturales— vívense más bien como’l cruz de principios: momentos d’inestabilidá onde lo que paecía caltener el mundu dexa de facelo y lo que va venir tovía nun pue formulase a les clares. Vivimos un tiempu de munches transiciones, onde’l clima nun remite namás a l’atmósfera y a les sos alteriaciones físiques, sinón tamién al clima social que respiramos: les formes de convivencia, de conflictu, de curiáu y d’imaxinación colectiva qu’atraviesen les nuestres vides. Nun habitamos un clima namás, sinón munchos climes superpuestos: ambientales, sociales, políticos, afectivos y espirituales, que nos atraviesen y nos tresformen.
Dende tiempos ancestrales, l’arte acompañó esti tipu de momentos. Muncho primero de convertise en disciplina o institución, foi y ye una de les práctiques humanes fundamentales p’atravesar el cambéu: rituales, imáxenes, rellatos y xestos qu’ayudaron a munches y diverses comunidaes a reorganizar la so rellación col territoriu, col tiempu, colo desconocío. En civilizaciones antigües y saberes vernáculos contemporáneos, les práctiques artístiques vincúlense a los ciclos climáticos o a la construcción de vínculos ente lo humano y lo non humano. En toos estos contestos y al traviés de los sieglos, l’arte nun ufiertó soluciones técniques o respuestes nítides, pero sí orientación difusa.
La Bienal Climática concibe l’arte como una práctica d’acompañamientu onde les y los artistes operen como guíes de pasu, capaces d’abrir preguntes, señalar fricciones, mostrar lo oculto o proponer maneres sensibles d’orientase n’escenarios onde nun hai mapes definitivos. Énte d’un rellatu dominante qu’insiste nel agotamientu social y el colapsu ambiental como lo esperao, la Bienal Climática apunta, al traviés del arte, pa una enerxía contraria: maneres de pensar y facer qu’ensayen presentes más xustos y habitables.
Col títulu Ensayar lo inesperado, la primer edición de la Bienal Climática señala la posibilidá de crear espacios d’alcuentru, escucha y esperimentación al traviés del arte, capaces de sobreponese a la urxencia ambiental o la polarización. “Ensayar” plantégase equí como un aprendimientu compartíu, un xestu que se despliega n’acción y en diálogu con otros. “Lo inesperao” abre un campu de posibilidaes: práctiques, imaxinarios y maneres de vida que surden del presente y proyecten formes nueves d’habitar xuntes/os el mundu. Ensayar lo inesperado propón aceptar la incerteza como terrén d’acción, ensin resignase a esperar la catástrofe.
Na so primer edición, esti ensayu de lo inesperao despliégase de forma asitiada n’Avilés y en dellos enclaves rurales d’Asturies. Un territoriu atravesáu por una historia minera y industrial intensa, por procesos de reconversión y descarbonización tovía abiertos, y por ámbitos rurales que caltienen otres maneres de rellación cola tierra. L’averamientu al contestu construyóse de forma colectiva dende la escucha y el diálogu, al traviés de ferramientes como una cartografía crítica ellaborada pola artista Elisa Cuesta o de procesos de mediación cultural con organizaciones locales guiada pola investigadora comisarial Zoe López y del propiu procesu creativu d’artistes variaes, acompañáu por esta dirección artística y les investigadores comisariales Carla Jaria y Elena Mataix. Dende esti enfoque, la bienal nun s’entiende como un dispositivu qu’impón un rellatu o un proyectu nuevu, sinón como un mediu reactivu qu’acompaña y amplifica lo que yá ta en marcha.
A partir d’estos exercicios d’averamientu al contestu local y d’atención al momentu global, Ensayar lo inesperado presenta esposiciones distribuyíes en 11 sedes d’Avilés y un programa públicu qu’activa 15 espacios del territoriu. Amás, propón otres llinies de trabayu qu’amplíen el so algame: la reconversión d’equipamientos públicos al traviés de proyectos d’arquitectura participativa, l’acompañamientu a práctiques comunitaries n’ámbitu rural cola investigación En Colectivo y esperimentos d’arte + educación.
Con esta diversidá de llinies de trabayu, Ensayar lo inesperado quier ampliar l’algame temporal del formatu bienal. El trabayu coles y colos artistes desplegóse en temporalidaes distintes qu’esceden el marcu del eventu. Nun compromisu cola práctica y esperimentación artística, la bienal llanza un programa de producción ACTS (arte, ciencia, tecnoloxía y sociedá). Vincúlase tamién cola Colección Estatal d’Arte y Clima cola incorporación d’obres de la bienal al conxuntu. Amás, incorpora adaptaciones de proyectos en marcha o procesos de creación n’estaos mui primeros y onde’l so desenvolvimientu va esceder la clausura de la primer edición de la bienal.
Ensayar lo inesperado propón asina un exerciciu de “andar en constelación” que nun s’atién a un tiempu y rumbu únicos, atendiendo a les rellaciones que nos caltienen y a los saberes qu’emerxen nel tránsitu. Les constelaciones nun indiquen un destín final: dexen orientase de la que s’avanza, calteniendo vivos los vínculos ente cuerpos, territorios, práctiques y tiempos diversos.
Al traviés d’estes constelaciones espositives, de programes públicos, educativos o de tresformación d’equipamientos públicos, la Ensayar lo inesperado axunta a más de cuarenta artistes y colectivos, con obres que se desplieguen en contestos urbanos, periurbanos y rurales en trés exas temátiques: Estación Meteo, Industrias Presentes y Duelos y Júbilos. D’un llau, Estación Meteo propón formes nueves d’observar, interpretar y comunicar lo atmosférico nun contestu d’emerxencia ambiental. Los proyectos de la Estación Meteo surden de residencies artístiques desenvueltes en diálogu cola Axencia Estatal de Meteoroloxía (AEMET) y otros organismos científicos. Otramiente, Industrias Presentes indaga nel heriedu y futuros posibles de la mayor actividá humana facedora de clima a nivel global, la industria. Distribuyida ente espacios vinculaos a la historia minera, industrial y productiva d’Avilés, Industrias Presentes axunta práctiques artístiques qu’examinen los imaxinarios de progresu, transición enerxética y sostenibilidá, amás de les sos tensiones materiales, sociales y simbóliques. A lo último, Duelos y Júbilos refierse a lo que nos enconta física y espiritualmente, a la dimensión afectiva y sensible de les transiciones: aquello que se pierde, lo que duel, pero tamién lo que se celebra y s’imaxina colectivamente.
Esti conxuntu diversu de práctiques —locales y internacionales, individuales y colectives— y temes nun proponen un rellatu únicu sobre’l clima ambiental y social, sinón un campu de rellaciones onde arte, territoriu y comunidá se entellacen. La Bienal Climática formúlase asina como un espaciu pa ensayar otres formes d’atención, convivencia y curiáu, entendiendo les transiciones non como un horizonte zarráu, sinón como un procesu compartíu que se construye en común.
Amanda Masha Caminals
Directora Artística, Bienal Climática: arte, industria y territoriu
