Anúnciense les primeres confirmaciones de participantes de la bienal

La Bienal Climática: arte, industria y territoriu va cuntar cola participación de más de 40 artistes nacionales y internacionales, xunto a creadores con vinculación al contestu local y a procesos d’investigación. Ente los primeros artistes confirmaos tán los integrantes de la Colección Estatal d’Arte y Clima, impulsada pol Ministeriu para la Transición Ecolóxica y el Retu Demográficu y el Ministeriu de Cultura: Asunción Molinos Gordo, Belén Rodríguez, Irene Grau, Abelardo Gil-Fournier, Sonia Navarro, Jorge Yeregui y Laura Palau.

Amás, van participar aquellos artistes qu’anguaño formen parte de los programes de residencies ACTS (arte, ciencia, tecnoloxía y sociedá) de la Bienal Climática, como Marion Balac, Enar de Dios Rodríguez, Rotor Studio, Nadia Penella, Víctor Mazón, Natalia Domínguez, Elena Lavellés, Andrea Molina y Mario Santamaría. Estos participantes realizaron una residencia na Axencia Estatal de Meteoroloxía (AEMET) y na Fundación CIUDEN, dambes instituciones dependientes del Ministeriu para la Transición Ecolóxica y el Retu Demográficu (MITECO).La Bienal Climática nun va acoyer namás esposiciones, sinón que tamién va desenvolver conciertos, talleres, acciones performatives y espacios de conversación, conectando arte, ciencia y sociedá. Col lema Ensayar lo inesperao, l’eventu convida a reflexonar sobre la rellación ente cultura, industria, territoriu y vida cotidiana, esplorando maneres d’habitar y curiar el nuestru entornu frente a los retos climáticos.

Adquisiciones pa la Colección Estatal d’Arte y Clima

Abelardo Gil-Fournier

Hacendera 2023

Hacendera ye una instalación formada por un conxuntu de vasíes de barru que xiren de manera constante, activando un procesu continuu de tresformación material y sonora. El contactu y el choque ente les pieces xeneren un paisaxe acústicu persistente, y el mesmu barru va erosionando amodo y dexa restos nel espaciu. Inspirada nes facenderes (formes tradicionales de trabayu comunal) la obra propón una reflexón sobre l’esfuerciu colectivu, el tiempu compartíu y los procesos lentos de gastadura y sedimentación que traviesen tanto a la materia como a les comunidaes.

Irene Grau

A punto de hacer nada 2019–2021

A punto de hacer nada ye’l resultáu de trés años d’investigación sobre los procesos estractivos y de renaturalización de los cielos abiertos nes cuenques mineres de Llión y Asturies. La obra enllaza tiempos xeolóxicos y humanos, dende’l Carboníferu estefaniense hasta la tresformación contemporánea d’estos materiales en fumu y residuos. Al traviés d’una monocromía potente, l’artista convoca una escuridá múltiple: la del sosuelu, la del trabayu mineru y la d’una dómina marcada por crisis climátiques. El proyectu asume tamién un retu técnicu, ellaborando los llenzos a partir de materies recoyíes en bruto, treslladando la so testura y carga sensorial a la pintura.

Asunción Molinos Gordo

Mil Leches 2024

Mil Leches ye una instalación testil realizada con cuasimente una tonelada de llana recoyío na península ibérica, de resultes d’una investigación sobre races ovines, producción ganadera y economíes rurales. La obra cuestiona los discursos d’innovación y progresu asociaos a la estandarización, poniendo en valor saberes vernáculos y sistemes productivos marxinalizaos. La llana, en tresformación constante, conviértese nuna metáfora d’identidaes híbrides, resistencies locales y formes de conocencia non hexemóniques.

Sonia Navarro

Ensin títulu [Espartu] 2024

Sonia Navarro trabaya con espartu, una fibra vexetal tradicional del sureste ibéricu, como material simbólico y ecolóxico. La obra conecta saberes artesanales, xenealoxíes femenines y práctiques sostenibles vinculaes al so sitiu d’orixe, Puerto Lumbreras. Acullá del so valor cultural, l’espartu cumple una función ecolóxica esencial na protección del suelu frente a la erosión. Navarro reivindica estes conocencies como formes de resistencia frente a los discursos hexemónicos de progresu y desenvolvimientu.

Laura Palau

Flexió de Xilema 2025

En Flexió de Xilema, Laura Palau recupera vínculos afectivos y materiales cola redolada rural al traviés d’árboles locales y les histories que los arrodien. L’artista fotografía exemplares secos primero de que se valten y enmarca cada imaxe cola madera del propiu árbol, construyendo oxetos que remiten a les persones que los curiaron. La obra remembra saberes tresmitíos, xestos manuales y rellaciones non instrumentales cola naturaleza, proponiendo una resistencia íntima frente a la falta d’arraigu y la homoxeneización contemporánea.

Belén Rodríguez

I danced myself out of the womb 2023

Telón realizáu con tinte natural a partir de material recoyío d’árboles y plantes d’una mata de Cantabria. Esta mata compróla l’artista cola mira de defendela pa que nun la valten. El material recoyío representa de manera física esa mata defendida, montés y llibre, porque discurre pel texíu hasta formar parte de les sos molécules. Usando la técnica shibori, l’artista establez un paralelismu ente les fueyes de los árboles y les plumes de los páxaros. La fueya de los árboles representa una especie de mantu maternal qu’abelluga y defende les especies animales que viven dexaxo de la rama, incluyida la propia artista.

Formatu: Telón pigmentáu de 10 x 2,4 m con raíl.

Jorge Yeregui

La escritura de las piedras 2024

Esti proyectu encara’l cambéu de paradigma enerxéticu y la transición dende un modelu basáu en combustibles fósiles escontra otru sofitáu n’enerxíes anovables, atendiendo a los sos efectos sobre’l territoriu. La obra asítiase na Gran Corta de Fabero, un enclave mineru incluyíu nos Convenios de Transición Xusta, y conecta’l zarru de la minería del carbón colos procesos de restauración medioambiental y el tiempu xeolóxicu. Al traviés d’imáxenes, testos y archivu, el proyectu propón una llectura crítica del paisaxe como superficie onde s’inscriben capes d’historia, esplotación y tresformación.

Residencias ACTS METEO

Marion Balac

pov 2025–2026

Esti proyeutu investiga formes de cooperación y comunicación non humanes a partir d’una pregunta central: ¿cómo s’entiende la meteoroloxía dende un puntu de vista non humanu? Marion Balac desenvuelve una serie de vídeos inspiraos nos llinguaxes de les redes sociales, onde plantes y otros axentes naturales adopten roles propios de la cultura dixital contemporánea, como si fueren influencers. La obra propón una reinterpretación de los sistemes de socialización en llinia, especialmente de les redes sociales, desplazando l’atención escontra formes de conocimientu vexetal y ecolóxicu que cuestionen l’antropocentrismu dominante na observación del clima.

Enar de Dios Rodríguez

Above All 2025–2026

Above All encara de forma crítica’l sistema económicu, científicu, tecnolóxicu y sociopolíticu que configura’l cielu y l’atmósfera contemporánea. La obra entiende’l cielu non namás como un espaciu esplotáu y reguláu, sinón tamién como un suxetu espresivu marcáu por conflictos, resistencies y formes de resiliencia colectiva. Al traviés d’un aproximamientu poéticu y políticu, el proyectu cuestiona los sistemes que determinen la ocupación, esplotación y contaminación del espaciu aereu, proponiendo una mirada oponente que confía na potencia tresformadora del facer compartíu y la colectividá.

Natalia Domínguez

[Títulu pendiente] 2025–2026

El proyectu vincula dos usos históricos y simbólicos del vapor d’agua pa reflexonar sobre modelos de rellación col territoriu. D’una parte, recupera’l mitu del Garoé, l’árbol capaz de captar la humedanza de les nubes na isla d’El Hierro, y les tecnoloxíes tradicionales de “atrapanubes” desenvueltes en territorios áridos. D’otra parte, conecta esti usu cuidadosu del agua cola invención de la máquina de vapor y l’empiezu d’un periodu d’estractivismu industrial basáu na esplotación intensiva de recursos naturales. La obra imaxina narratives alternatives onde’l vapor d’agua nun seya instrumentu de dominación, sinón de convivencia cola redolada.

Victor Mazón

Fósiles en Movimiento 2025–2026

Fósiles en Movimiento investiga cómo fenómenos atmosféricos como’l vientu y la presión del aire dexen buelgues invisibles nel paisaxe. La obra céntrase no que l’artista llama “fósiles sonoros”: vibraciones, infrasoníos y fluxos que, anque imperceptibles, modelen la tierra y los dispositivos tecnolóxicos. Al traviés de materiales orgánicos y inorgánicos en movimientu, el proyectu esplora ecoloxíes sonores en territorios d’estracción de materies primes y enerxía, amosando la rellación ente atmósfera, tecnoloxía y paisaxe.

Nadia Penella

Centinelas del Clima 2025–2026

Centinelas del Clima ye un proyectu audiovisual desenvueltu nel marcu de les residencies artístiques ACTS en collaboración cola Axencia Estatal de Meteoroloxía (AEMET). La obra garra un enfoque documental y observacional pa poner cara y voz a quien trabayen caldía na producción, interpretación y tresmisión de los datos meteorolóxicos. Al traviés del siguimientu de dellos departamentos, espacios y fenómenos atmosféricos, la pieza traduz el llinguaxe técnicu del clima a un planu sensible y accesible, sorrayando la dimensión cultural, social y humana de la meteoroloxía nun contestu d’emerxencia climática.

Rotor Studio

[Título pendiente] 2025–2026

Esti proyectu consiste nuna estación meteorolóxica esperimental móvil que traduz datos atmosféricos y de calidá del aire nun llinguaxe artísticu y plásticu. La obra busca amenorgar l’astracción de la información científica xenerada pola AEMET, convirtiéndola nuna esperiencia visual y sensorial algamadiza. Al traviés de procesos abiertos y esperimentales, la instalación convida a repensar cómo se perciben, interpreten y comparten los datos climáticos, abriendo posibilidaes creatives y educatives nueves.

Residencies ACTS Transiciones Xustes

Elena Lavellés

El aliento del aire 2025–2026

El aliento del aire ye una instalación desenvuelta nel marcu de la residencia ACTS Transiciones Xustes en CIUDEN. La obra encara’l procesu de producción d’hidróxenu verde dende un averamientu poéticu y sensorial, poniendo en rellación infraestructures enerxétiques, territorios postindustriales y futuros ecosociales. Al traviés de videu y escultura, el proyectu cuestiona los imaxinarios tecnolóxicos dominantes y propón una reflexón crítica sobre les formes de transición enerxética y el so impactu nos territorios.

Andrea Molina

Geo-fantasies 2025–2026

Geo-fantasies investiga los imaxinarios visuales y discursivos alredor del hidróxenu verde y la transición enerxética. El proyectu analiza cómo la industria produz imáxenes de futuru basaes en promeses de progresu y sostenibilidá, y plantega la necesidá d’abrir estos imaxinarios a la participación ciudadana. Al traviés de vídeos, cartografíes y dibuxos, la obra cuestiona quién imaxina’l futuru enerxéticu y dende qué sitios, proponiendo narratives alternatives más crítiques, inclusives y asitiaes.

Mario Santamaría

[Título pendiente] 2025–2026

Esti proyectu investiga les infraestructures de distribución de gas a partir d’un viaxe que conecta l’espaciu domésticu del artista con una rede planetaria de tresporte enerxéticu. El percorríu garra la forma de la mesma infraestructura como métodu d’investigación, atendiendo al solapamientu ente cuerpu, territoriu y infraestructura. Conceptos como la presión, el comportamientu de les partícules o la temperatura nos procesos d’almacenamientu y tresporte articulen formalmente los materiales resultantes. La obra propón una reflexón crítica sobre les redes invisibles que sostienen la vida contemporánea y les sos implicaciones polítiques y ambientales.