La Bienal Climática llega al ecuador de la so primer edición con una programación que yá axuntó a miles de participantes.

La Bienal Climática entra nel ecuador de la so primer edición
afianzándose como ún de los grandes acontecimientos culturales del
branu n’Asturies. De magar s’inauguró’l mes de xunu pasáu, más de
4.500 persones participaron nes actividaes del programa públicu:
visites guiaes, conversaciones, talleres, performances,
inauguraciones y alcuentros, una cifra que reflexa l’interés que ta
espertando una propuesta qu’asitia l’arte, la cultura y el diálogu nel
centru del debate sobre la transición ecolóxica.
A esta participación súmase l’algame d’un proyectu concebíu como
una bienal repartida per tola ciudá. Con trece espacios espositivos
abiertos a lo llargo de más de cien díes, intervenciones nel espaciu
públicu y una programación que sigue tol branu, la organización
calcula un algame acumuláu d’alredor de 90.000 persones al
rematar la Bienal. Esta estimación básase na duración del eventu, la
distribución de la programación en dellos espacios y el calter abiertu
de munches actividaes, factores qu’amplíen l’algame potencial de la
Bienal.

Agostu: el momentu pa descubrir la Bienal
Climática

Nel mes d’agostu y hasta’l 20 de setiembre que vien, la Bienal
Climática convida a residentes y visitantes a percorrer los sos trece

espacios espositivos, repartíos per dellos espacios d’Avilés, y
descubrir un proyectu que propón miraes nueves sobre la rellación
ente arte, industria, territoriu y transición ecolóxica.
Con más de cuarenta artistes nacionales y internacionales, la Bienal
desplegó hasta’l momentu una programación multidisciplinar formada
por esposiciones, itinerarios pel territoriu, llaboratorios ciudadanos,
talleres, proyecciones, artes vives, visites guiaes y espacios de
diálogu que conviden a reflexonar sobre cuestiones como la memoria
industrial, la biodiversidá, el patrimoniu vivu, la tresformación de les
ciudaes o los retos de la transición ecolóxica. La programación cuntó,
amás, cola participación de voces destacaes del ámbitu científicu,
cultural y artísticu, como l’ecólogu y espertu en cambéu climáticu
Fernando Valladares, qu’intervieno nel actu inaugural. Ente les
actividaes con más participación destacó tamién la ruta guiada pol
naturalista David Alonso, qu’axuntó a cerca de 300 persones nun
percorríu pa descubrir el paisaxe urbanu d’Avilés.
Les Derives de la Cartografía Crítica, la esposición ¡Aquí hay
petróleo!, el Llaboratoriu Eco-ficciones, el Llaboratoriu
Ciudadanu, el ciclu cinematográficu Mocedá tres de la cámara, la
película Fiebre, amás d’actividaes familiares y percorríos pel
patrimoniu natural y cultural d’Asturies, convirtieron Avilés nun
espaciu d’esperimentación cultural onde disciplines y comunidaes
dialoguen pa imaxinar formes nueves d’habitar el territoriu.

La conversación como puntu de partida pa la
transición ecolóxica

Ún de los momentos más destacaos de les últimes selmanes foi’l
festival Celsius 232, cola participación de Juliet Marillier, Sofía Rhei
y l’escritora estaunidense Becky Chambers, una de les voces más
influyentes de la ciencia ficción contemporánea.
Nel alcuentru defendió qu’encarar la crisis climática precisa muncho
más que soluciones tecnolóxiques o acciones individuales. La
transición ecolóxica, afirmó, esixe tresformaciones estructurales,
formes nueves de cooperación y un usu de la tecnoloxía empobinada
al bien común. Tamién sorrayó’l papel de la cultura, la lliteratura y la
imaxinación pa construyir futuros posibles, recordando qu’escuchar
perspectives distintes, aceptar el desalcuerdu y fortalecer les
comunidaes son condiciones imprescindibles pa encarar los grandes
retos del presente.

Unes idees que conecten dafechu col propósitu de la Bienal
Climática: crear espacios onde persones, disciplines y instituciones
puedan atopase pa construyir preguntes compartíes primero que
respuestes úniques.

Una Bienal comprometida cola meyora
continua

La Bienal Climática entiende la sostenibilidá como un procesu de
meyora continua. Por eso, incorporó midíes p’amenorgar l’impactu
ambiental de la so organización y despliegue, como la reutilización
de materiales espositivos, la optimización de recursos, la
collaboración con provisores locales y el diseñu d’una programación
repartida que favorez los desplazamientos andando ente los
espacios. Más que presentar soluciones zarraes, la Bienal busca
demostrar que la transición ecolóxica tamién supón revisar les
formes de producir cultura.

Una invitación a percorrer Avilés

Hasta’l 20 de setiembre que vien, la Bienal Climática convida a
descubrir Avilés dende una mirada nueva. Les sos esposiciones,
intervenciones y actividaes proponen percorrer la ciudá, detenese
nos sos espacios patrimoniales y industriales y participar en
conversaciones que rellacionen arte, territoriu, memoria, industria y
futuru.
Porque la Bienal Climática parte d’un convencimientu cenciellu: les
grandes tresformaciones nun empiecen con respuestes, sinón
con conversaciones.