La Bienal Climática confirma ocho espaciu expositivos pa la so primera edición

El Centru Niemeyer va presentar una programación espositiva na celebración de la Bienal Climática que va proponer una reflexón fonda y multidisciplinar sobre’l cambéu climáticu al traviés d’obres d’artistes internacionales de primer nivel. Les muestres van convidar a repensar la rellación ente’l ser humanu y la so redolada, ufiertando una visión de la naturaleza nel arte de la contemporaneidá y dexando a les clares les tresformaciones provocaes pola acción humana y les miraes de los creadores. Amás, les esposiciones planteguen un debate críticu sobre la esplotación, xestión y preservación de la redolada natural onde se mueve’l ser humanu, sorrayando la urxencia d’avanzar p’hacia modelos más sostenibles y responsables.

El programa públicu va desenvolvese en más de quince espacios clave, como’l Parque de Ferrera o la Casa Municipal la Cultura.

Vieya Pescadería Municipal d’Avilés (La Grapa)

La Vieya Pescadería Municipal d’Avilés inauguróse en 1918 al pie de la ría, concebida orixinalmente como un mercáu destináu al comerciu de pexe fresco, en rellación estrecha cola actividá portuaria y la vida de caldía de la ciudá. El so allugamientu estratéxicu y la so función comercial convirtiéronla nun nodu fundamental d’intercambiu y suministru en bona parte del sieglu XX, formando parte del texíu urbano vinculáu al trabayu de la mar y a la economía local. Col pasu del tiempu, l’edificiu dexó de cumplir la so función orixinal y foi reconvertíu nun espaciu d’usu cultural, integráu na redolada de la pasarela de La Grapa y en diálogu directu col Centru cultural Niemeyer. Anguaño, l’edificiu acueye esposiciones y actividaes culturales y alluga’l puntu nuevu d’información turística de la ciudá, reforciando’l so calter d’espaciu de tránsitu y acoyida tanto p’habitantes como pa visitantes, de la que conserva’l so valor históricu y urbanu.

Centru Niemeyer

El Centru Niemeyer ye una puerta abierta a toles artes y manifestaciones culturales. La música, el cine, el teatru, la danza, les esposiciones o la pallabra son los protagonistes d’una programación cultural multidisciplinar que quier llegar a tolos públicos. Inauguráu nel 2011, ye la única obra n’España del xenial arquitectu brasileñu Oscar Niemeyer. Tol añu ye posible entamar actividaes culturales y congresos nos sos espacios y conocer la so historia en detalle al traviés de les visites guiaes. El Centru Niemeyer ye ún de los referentes culturales y encantos turísticos d’Asturies, amás d’un símbolu de la tresformación d’Avilés.

Escuela d’Artes y Oficios

La Escuela d’Artes y Oficios d’Avilés cunta con una trayectoria de más de 148 años y naz gracies al impulsu de los indianos, que promovieron la creación d’una institución destinada a la formación de capataces y trabayadores especializaos, facilitando l’accesu al emplegu y contribuyendo al desenvolvimientu industrial y social de la ciudá. Dende los sos oríxenes, la escuela combinó la enseñanza técnica cola formación n’oficios, y incluyó tamién educación femenina n’ámbitos como los llabores domésticos y el texíu. Foi, amás, la primer escuela de maestría pa maestros industriales n’Avilés. A lo llargo de la so historia, l’edificiu desempeñó funciones bien diverses, reflexu de los cambeos sociales y políticos del contestu: dio llugar a la Escuela d’Aprendices d’ENSIDESA, funcionó como institutu d’enseñanza media y usóse como cárcel na Guerra Civil. Sufrió dos quemes a lo llargo del tiempu, anque se caltuvo la so fachada histórica, que permanez como testimoniu del pasáu educativu y industrial del inmueble. Ente los oficios y disciplines que s’impartíen destaquen la talla de madera, la talabartería, el telar, la pintura y l’acuarela. Ye menester señalar tamién la vinculación de l’artista Maruja Mallo, figura destacada de la vanguardia española, quien impartió clases na escuela. Anguaño, la Escuela d’Artes y Oficios funciona como Patronatu de la Escuela d’Artes y Oficios, calteniendo la so vocación formativa y el so papel como espaciu cultural activu na ciudá.

Factoría Cultural d’Avilés

La Fábrica de Confecciones Camino foi una de les industries testiles más relevantes d’Avilés nel sieglu XX. Fundada en 1946 por Segundo Camino Piedra y proyectada pol arquitectu Tomás Menéndez Abascal, el complexu formábenlu dos grandes naves d’aproximao 10 x 40 metros y un edificiu anexu qu’allugaba oficines, comedor y vestuarios. La fábrica foi un exemplu significativu del desenvolvimientu industrial de la ciudá na posguerra y del papel de la industria testil na configuración del texíu urbano y social d’Avilés. Tres del cese de l’actividá industrial, l’edificiu foi oxetu d’un procesu de rehabilitación qu’empezó nel 2007 y remató nel 2010 cola so reapertura como la Factoría Cultural d’Avilés. Anguaño, l’espaciu funciona como un centru artísticu y cultural multidisciplinar de referencia, qu’acueye talleres de creación, sales d’ensayu, una sala escénica, un FabLab y la Escuela Municipal de Cerámica, consolidándose como un nodu activu de producción cultural y formación artística na ciudá.