Presentación de la 1.er Edición de la Bienal Climática y Residencies

• La organización adelantó componentes de la programación de la primer edición énte’l sector cultural d’Asturies na Factoría
• Como parte de la collaboración cola Factoría, la Bienal Climática va reforciar les residencies artístiques del centru
• La primer bienal d’arte y clima diseñada n’España naz como frutu de l’alianza ente’l Ministeriu de Cultura, el Ministeriu de Vivienda y Axenda Urbana, el Ministeriu de Transición Ecolóxica, el Gobiernu d’Asturies, el Conceyu d’Avilés y la Fundación Atelier itd

La Factoría Cultural d’Avilés acoyó el xueves 5 de xunu, l’eventu de presentación de la 1.er Edición de la Bienal Climática, que va ser n’Avilés y Asturies ente mayu y setiembre del 2026. La Bienal Climática ye un espaciu d’alcuentru qu’apuesta por movilizar l’arte y la cultura pa crear sensibilidaes colectives nueves frente a les transiciones climátiques xustes.

La organización d’esta Bienal supón un esfuerciu compartíu ente’l Ministeriu de Cultura, el Ministeriu pa la Transición Ecolóxica y el Retu Demográficu, el Ministeriu de Vivienda y Axenda Urbana, el Principáu d’Asturies, el Conceyu d’Avilés y la Fundación Atelier itd.

A lo llargo del eventu de presentación, al qu’asistieron representantes del sector cultural asturianu y entidaes públiques de la rexón, compartióse’l modelu de Bienal d’Arte propuestu pola Bienal Climática. Un modelu descentralizáu y collaborativu, comprometíu con evitar la sobreproducción d’obres y con promover un programa accesible a tolos públicos; con diversidá d’espacios, formatos y artistes.

Espúnxose tamién el trabayu d’averamientu al territoriu realizáu dende la Bienal Climática, qu’orixinó los trés ámbitos temáticos d’esta primer edición. A lo último, anuncióse la collaboración cola Factoría Cultural d’Avilés, onde les residencies de producción artística se van dotar esti añu d’un calter tresdisciplinar vinculáu a la industria.

PRIMER EDICIÓN DE LA BIENAL CLIMÁTICA

La escoyeta d’Avilés y Asturies p’acoyer la primer edición de la Bienal Climática nun ye casual: esti territoriu, con un heriedu industrial ampliu, atópase nun momentu clave de cambéu social, económicu y públicu. La Factoría Cultural d’Avilés, anfitriona d’esti eventu, ye un espaciu marcáu por esti procesu.

Sede de la fábrica vieya de camises Confecciones Camino, ye anguaño ún de los principales centros de producción artística d’Avilés y un sitiu importante d’alcuentru de comunidaes culturales locales. Un exemplu claru d’una reconversión industrial dende una dimensión cultural y social.

Al traviés d’esta presentación la Bienal Climática quixo abrise a vínculos coles comunidaes locales, yá que busca ser un espaciu abiertu a la participación de la ciudadanía y del sector cultural. La intención ye qu’esti contestu participativu quede reflexáu nel programa de la Bienal Climática al traviés d’intervenciones artístiques n’espacios emblemáticos de la ciudá, residencies de creación artística, investigaciones tresdisciplinares, y espacios de diálogu y participación ciudadana.

Pa eso, la programación artística estructúrase alredor de trés ámbitos temáticos que surdieron a partir d’un averamienttu al contestu d’Asturies y Avilés pela vía d’un trabayu d’análisis territorial. El primer ámbitu repiensa la industria del sieglu XXI en transición enerxética dafechu, reconfigurada poles demandes de descarbonización y les sos derives estractivistes nueves, amás de pol puxu del capitalismu dixital. El segundu ámbitu reflexona sobre l’impactu ecolóxicu y social de los sistemes alimentarios, pero tamién piensa nel alimentu como un articulador de comunidaes; un elementu que nos convida a tar en colectivo. El tercer ámbitu céntrase nes utopíes práctiques, na diversidá de propuestes que nos conviden a, o nos muestren que ye posible, vivir una rellación cola contorna de forma sostenible y rexenerativa.

REFUERZU A LES RESIDENCIES ARTÍSTIQUES DE LA FACTORÍA CULTURAL D´AVILÉS

La Factoría Cultural d’Avilés tien una tradición llarga de sofitu al sector cultural local. Una d’estes iniciativas son les residencies anuales de creación artística. A lo llargo de la edición que vien d’estes residencies, la Factoría Cultural d’Avilés y les y los artistes escoyíos van cuntar con un refuerzu dende la Bienal Climática.

L’oxetivu d’esta collaboración ye vincular les residencies a cuestiones climátiques y a la creación interdisciplinar, conectando les propuestes artístiques escoyíes con proyectos d’investigación científica. Contémplase tamién un complementu na dotación económica d’alcuerdu coles necesidaes de cada proyectu, un trabayu comisarial y un apoyu de visibilización.

Pa too eso, nos díes vinientes va abrise la convocatoria pa escoyer 6 artistes locales, 1 d’España y 1 internacional que van participar nes residencies. Dientro de los marcos temáticos de la Bienal Climática, estes residencies van cuntar con un enfoque tresdisciplinar conectáu coles ciencies y la industria del sieglu XXI. Les obres creaes a lo llargo del periodu de residencia van esponese como parte de la Bienal Climática nos meses de mayu y setiembre del 2026.