Toos estos elementos van articulase nun dispositivu instalativu que xenera un xuegu de descontestualización dialóxica, convidando al espectador y al participante a cuestionase: ¿qué ye un entornu?, ¿cómo lu percibimos?, ¿de qué manera lo construyimos simbólicamente? L’actividá consiste na observación, captación y interpretación de la redolada inmediata al traviés de práctiques plástiques como l’apropiación, el dibuxu, la pintura y la escultura. Les pieces resultantes van ser integraes nuna instalación colectiva nel quioscu del parque de Ferrera, configurando un cuadernu de campu espandíu, entendíu non solo como rexistru, sinón como espaciu de pensamientu visual compartíu.

La participación ta abierta a tolos públicos. Les persones participantes van disponer de materiales de plástica pa la realización de les sos obres, que van pasar a formar parte de la instalación final. D’esta miente, el proyectu constrúyese como un procesu vivu, en tresformación constante, onde cada aportación contribuye a redefinir el paisaxe y el so significáu.