Pa la so participación na Bienal Climática, el colectivu Paisanaje va facer una intervención a partir de les sos investigaciones sobre producción alimentaria, creación artística y configuración de territoriu. La importancia histórica del mercáu de la ciudá asturiana, pol so allugamientu privilexáu na ría d’Avilés, va articular la propuesta, que quier incidir na centralidá de la plaza pa la producción d’arraigu, la creación de territoriu y el fortalecimientu del llazu social.

El mercáu d’abastos apaez asina como un espaciu fundamental pa la configuración de posibles alternatives al sistema corporativu global de producción d’alimentos qu’enllenó los supermercaos de «comida de nenguna parte». Aguacates, pechugues de pollu, filetes de gochu, llubines y quesos qu’enllenen les repises de los supermercaos. Mercancíes suministraes pola mano invisible del mercáu que convierte los alimentos en fetiches desprovistos del so orixe, como les obres que cuelguen nes parés del cubu blancu. El «nenguna parte» nun se refier namás a la nuestra ignorancia sobre’l verdaderu llugar de procedencia xeográfica de lo que comemos, de lo que vemos, de lo que mercamos, sinón qu’alude tamién al complexu procesu d’intencional ocultamientu de les cadenes d’esplotación, asina como d’otres esternalidades pernicioses qu’implica la so producción.