El Palaciu de Camposagrado, asitiáu nel cascu históricu d’Avilés, ye ún de los principales exemplos d’arquitectura barroca de la ciudá. Construyíu ente finales del sieglu xvii y empiezos del xviii pol arquitectu avilesín Francisco Menéndez Camina, l’edificiu presenta dos fachaes principales con significaos estremaos: una norte, d’influencia renacentista, orientada escontra l’antigua muralla y el puertu; y otra sur, de calter más ornamental, con torres simétriques y un gran escudu heráldicu que reflexa l’estatus aristocráticu de los sos propietarios.