Chioma Ebinama (Nueva Jersey, EE. UU., 1988) construye una práctica sincrética onde conviven la cosmoloxía igbo, el cristianismu heredáu de los sos padres nixerianos, la escultura ritual africana y el manga xaponés. Al traviés de l’acuarela sobre papel, entendida como actu meditativu y forma de comunicación col mundu visible y invisible, busca crear «mitoloxíes nueves pa la diáspora africana»: imáxenes que nun afiten un orixe, sinón qu’invoquen maneres alternatives de conocimientu dende lo lúdico. Pa l’artista, el xuegu constituye una posición política y una forma de resistencia.

what’s coming 4 them is coming 4 O (2025) ye un conxuntu d’acuareles sobre papel Khadi trabayaes con tinta sumi, gouache y café, qu’esploren la dimensión espiritual y emocional del presente nun diálogu ente lo apocalíptico, lo onírico y lo lúdico. El títulu condensa una de les tensiones centrales de la obra: el llinguaxe de los SMS tresporta una alvertencia de resonancia bíblica a la velocidá de la comunicación dixital, como si l’anunciu del Apocalipsis llegare al traviés de mensaxe de WhatsApp. Cisnes negros con cares de muñeca, flores sonrientes, ánxeles que lloren y figures n’éxodu habiten un bestiariu inspiráu nel Libro de las Revelaciones, reinterpretando lo apocalíptico non como final, sinón como entrada: un espaciu de tránsitu onde les histories d’otres cultures y especies son capaces d’abrir formes nueves de curiáu interespecie.