Sara García (Xixón, 1983) parte del alimentu compartíu pa reflexonar sobre la hospitalidá, el curiáu y les formes de rellación ente especies. En moulding mourning mouths (2025) l’artista garra’l pan como exa d’una investigación sobre’l duelu planetariu énte la pérdida irreversible de biodiversidá. El pan apaez equí non solo como alimentu, sinón tamién como archivu históricu y ceremonial: nél inscríbense les tresformaciones de la nuestra rellación col territoriu, dende los primeros rituales con trigu selvaxe hasta la industrialización agrícola contemporánea.

La instalación axunta videu, mázcares, traxes y figures realizaos con pan, xunto a una performance activada mientres la inauguración de la Bienal Climática. A partir de referencies que traviesen distintes cultures —dende rituales funerarios exipcios hasta panes de duelu asturianos—, García construye ceremonies de despidida dirixíes a microorganismos, insectos, hongos y otres formes de vida que desapaecen silenciosamente. Na so obra, el duelu conviértese nuna práctica colectiva y multiespecie: una forma d’acompañar la pérdida y, al empar, imaxinar xestos nuevos de curiáu y rexeneración.