Amanda Piña (Santiago de Chile, 1978) esplora formes de conocimientu inscrites nel cuerpu, el xestu y el movimientu colectivu. En To Bloom (Florecimiento) (2024), l’artista esplega una instalación escultórica vinculada a un procesu de talleres y performances que garra como puntu de partida organismos marinos ancestrales y formes d’existencia interespecie. La obra nació d’una visión: mientres una estancia en Yucatán, Piña suañó qu’una hamaca se tresformaba nuna anémona viva que la acoyía nel so interior, condensando alcordances d’infancia na marina chilena y la conciencia de la desapaición acelerada d’especies marines de resultes del cambéu climáticu.

La escultura enxareya filos d’hamaca texíos a mano y cañes de ratán, materiales travesaos por histories d’intercambiu colonial. Les sos redes, construyíes ensin nuedos, sostiénense a partir de la tensión y la rellación ente los filos, proponiendo una forma d’habitar más fluyida y permeable. Al traviés del movimientu y la esperiencia compartida, To Bloom (Florecimientu) plantea l’océanu non como recursu, sinón como archivu vivu de conocimientu y collaboración ente especies. La obra esplégase simultáneamente nuna escultura y una performance ente los árboles del Parque Ferrera, amás de nun videu presentáu nel Palaciu de Camposagrado.