Belén Rodríguez (Valladolid, 1981) trabaya con tintes vexetales, minerales y técniques testiles pa construyir obres nes que la materia funciona como archivu sensible d’un territoriu. En llugar de representar la naturaleza, les sos pieces incorporen físicamente los sos rastros: pigmentos estrayíos de fueyes, corteces o raíces que migren al texíu mientres el procesu de tiñíu.

En I Danced Myself Out of the Womb (2023), l’artista usa materiales recoyíos nuna viesca de Cantabria qu’adquirió pa protexela de la tala. La viesca nun apaez representada como imaxe: ta presente nel propiu telón. Realizada sobre algodón orgánico y trabayada cola técnica xaponesa shibori, la obra esplega trames orgániques que remembren simultáneamente fueyes y plumes, dos formes d’abellugu y protección. La xamasca apaez asina como un mantu qu’ampara la vida baxo él. El títulu, garráu del cantar «Cosmic Dancer», de T. Rex, introduz la danza como xestu de celebración y vulnerabilidá compartida: una manera de pensar la existencia dende la pertenencia y l’allegría. La pieza asítiase ente lo ecolóxico y lo maternal, y propón una reflexón sobre qué significa protexer.