P’Abelardo Gil-Fournier (Rabar, Marruecos, 1979), les práctiques artístiques nun son espresiones d’una suxetividá individual, sinón redolaes de mediación continua al traviés de les qu’otres escales se faen visibles.

Hacendera ye un coru de venticuatro vasíes de barru cocío en rotación sobre tornos d’alfarería, doce d’ellos conectaos a pequeños motores. Debíu a la so irregularidá, les vasíes nun xiren de manera autónoma: ráspiense, impúlsense mutuamente y tresmiten el movimientu al conxuntu. D’esa fricción remanecen dos procesos simultáneos y indixebrables.

Per un llau, el resonar constante de los pequeños choques, que fai cimblar l’interior de cada vasía y espande’l soníu per tola sala. D’otru, una tresformación material gradual: el roce erosiona les superficies, dexa visibles los círculos de contactu y produz una sedimentación lenta d’arcilla alredor de les bases. La obra, nacida d’un procesu colectivu, incorpora esa mesma lóxica na so estructura: el so movimientu solo ye posible al traviés de la rellación ente les partes.