Radio Barullu ye un proyectu de mediación y radio impulsáu por La Benéfica de Piloña cola collaboración de la Fundación "la Caixa", que busca promover la participación activa de la ciudadanía y de la mocedá rural. El proyectu cuenta con distintes llinies de trabayu que van dende la collaboración con instituciones culturales y educatives hasta'l trabayu col texíu asociativu y cultural llocal. Pue conocese más sobre'l proyectu en radiobarullu.com.

Los proyectos de radio sobre la crisis climática realizaos en trés centros públicos del mediu rural asturianu, concretamente nos conceyos de Piloña y Cabranes, son frutu d'una collaboración ente La Benéfica de Piloña y la Bienal Climática que buscaba, per una parte, xenerar aliances ente instituciones culturales y educatives y, per otra, integrar y deprender de la escuela rural nos retos del presente. Nesi sentíu, la radio apaeció como una ferramienta d'aprendizaxe pol so potencial pedagóxicu y como una práctica artística contemporánea capaz de conectar disciplines y promover la participación activa del alumnáu nel proyectu.

Al traviés d'un procesu de codiseñu ente Alex Martínez, mediador de La Benéfica de Piloña, y el profesoráu de cada centru, surdieron trés iniciatives venceyaes a los exes temáticos de la Bienal Climática y que respondíen a les necesidaes de cada centru, del so alumnáu y del so entornu. Ente payares de 2025 y xunu de 2026, los proyectos desarrolláronse dientro del currículu educativu de los centros, trabayando distintes competencies de les asignatures implicaes. Cada centru contó cola presencia d'una artista asturiana que contribuyó a reforzar cada llinia d'investigación.

• CRA La Coroña (Alba Matilla): radioficciones creaes alredor de la investigación sobre'l patrimoniu obreru ya industrial abandonáu de Piloña.
• CEIP L'Ablanu (Raposu Roxu): guía sonora d'un xuegu cooperativu creáu a partir del cuestionamientu de la rellación humana cola naturaleza nel xuegu simbólicu.
• IES Infiestu (Sara García): radioficción sobre la tradición y los usos del maíz n'Asturies y la so vinculación col Antroxu.