Hablar de piedras. Léxico mineral. Proyecto ‘La escritura de las piedras’

Mientres la esplotación d'una mina de carbón a cielu abiertu, la rutina diaria consiste en convertir la roca en piedres pa poder moveles y acceder al mineral. Estes retírense y treslládense per aciu d'escavadores y dumpers que les depositen en montones, taludes y otres formes d'escombrera.

Hablar de piedras documenta 636 piedres asitiaes en cuatro zones distintes dientro del espaciu denomináu Valdesalgueros, nel norte de la Gran Corta. Estes imáxenes formen parte de cuatro llibros, ún pa cada zona d'acopiu, que s'amuesen deshojaos por pliegos na paré, onde les semeyes de les piedres s'intercalen con una escoyeta de testos que formen parte del Léxico mineral de José Joaquín Parra Bañón.

Nel so formatu d'instalación, estos amuésense deshojaos por pliegos, dando forma a una estensa retícula de piedres onde les páxines de testu marquen un ritmu que unifica'l conxuntu. Sicasí, nel so formatu encuadernáu, cada llibru inclúi una colección única de piedres, ente que toos comparten la mesma escoyeta de testos.

Valdesalguero I

Valdesalguero I pertenez a la serie fotográfica Los suelos de Peal. Esta documenta un conxuntu de fósiles del Carboníferu Estefaniense que apaecieron mientres la esplotación de la Gran Corta de Fabero, una de les mayores mines de carbón a cielu abiertu d'Europa. Estos localizáronse gracies a la ayuda del Aula Paleobotánica de Fabero y atopábense principalmente nos suelos de Peal y de La Inglesa, unes enormes llámines de piedra escura, de más d'una hectárea de superficie, onde s'atopaba depositáu'l carbón y cuyos nomes coinciden colos de les empreses encargaes de la estraición.

Los dibuxos marcaos sobre la roca revelen un monte formáu principalmente por exemplares de Dicksonia antarctica, Cyathea, Calamites y Annularia, que quedó soterráu hai trescientos millones d'años. Como nuna lleición d'anatomía, la firida abierta nel territoriu mientres la esplotación minera permítenos asomamos a un pasáu remotu que nos fala del tiempu xeolóxicu, del tiempu de la Tierra.

Nun momentu de fondu cambéu nel sector enerxéticu, el proyectu de restauración de la mina devolverá llueu esti paisaxe a un estáu previu y, con él, los suelos volverán quedar cubiertos pola montaña.

Esta serie fotográfica documenta asina un espaciu con un marcáu valor simbólicu y testimonial nel que conflúin el tiempu fondu de la xeoloxía, los efectos de la dependencia de los combustibles fósiles sobre'l territoriu y los procesos de restauración medioambiental que, anguaño, demanda'l planeta.