Lawrence Abu Hamdan (Amán, Xordania, 1985) esplora la dimensión política del soníu y el so papel na defensa de los derechos humanos y medioambientales. Nesta instalación, l’artista documenta una performance del saxofonista jawlaní Amr Mdah dende’l balcón d’una vivienda nel Golán siriu ocupáu, una de les mil trescientes cases rurales amenaciaes pola construcción de trenta y tres torbines eóliques que se van llevantar a malapenes trenta y cinco metros de les viviendes. El ruiu que van xenerar va facer prácticamente inhabitable’l territoriu y va forciar el desplazamientu de quien viven nél. La imaxe de la casa proyéctase sobre la malla d’un amplificador de baxu, convirtiendo la vivienda nuna caxa de resonancia. El soníu exuberante del saxofón, improvisáu al aire llibre, afírmase como un xestu d’autodeterminación sónica frente al réfugu. La obra convida a plantear preguntes más esixentes sobre ónde y cómo s’esplega la transición enerxética y sobre qué formes de vida queden fuera de los sos cálculos.