Mario Santamaría (Burgos, 1985) investiga les infraestructures materiales que sostienen aquello que percibimos como inmaterial: Internet, la enerxía o los fluxos de datos. El so métodu consiste en percorrer físicamente esos sistemes. Tres d’una residencia na Fundación Ciudá de la Enerxía (CIUDEN) del Ministeriu pa la Transición Ecolóxica y el Retu Demográficu (MITECO), en Cubillos del Sil, l’artista viaxó ente L’Hospitalet de Llobregat y Cubillos del Sil, pasando per Asturies y siguiendo’l trazáu de los gasoductos, p’adoptar la lóxica de circulación del propiu gas al traviés del territoriu.

La instalación traduz esi percorríu nuna llinia continua de seis planches de fierro sobre les que s’espleguen fotografíes, grabaos y anotaciones: nodos, estaciones de recompresión y alteraciones de la vexetación que delaten el trazáu soterrañu. En paralelu, un videu vertical introduz un segundu viaxe, esta vez algorítmicu, filtráu polos sistemes de recomendación que’l propiu artista alimenta y esaxera al usalos como ferramienta d’investigación. Surden asina imáxenes hipnótiques,escultóriques y cargaes d’humor, onde’l cilindru funciona como filo conductor. La obra propón asina un doble desplazamientu y revela que les infraestructures enerxétiques y dixitales comparten un mesmu metabolismu planetariu con una base material común.