Les dos fotografíes presentaes nesti espaciu axunten dos llinies d’investigación. De la serie Ampliación del territorio, y baxo una premisa estricta de non manipulación, infraestructures y restos materiales de l’actividá industrial apaecen travesaos por una estrañedá latente que mueve la mirada documental escontra lo especulativo. El paisaxe nun se rexistra: amplíase.

De la serie Órbita, l’artista propón una analoxía cosmolóxica: mientres décades, el sistema económicu, social y cultural asturianu xiró alredor de la industria pesada del metal con una fuercia comparable a la de los planetes alredor d’una estrella. Xuntes, dambes imáxenes formen un dípticu sobre les inercies industriales. Una dirixe la mirada al suelu: al residuu material d’una promesa industrial inscrita nel territoriu. La otra mira al cielu, con cierta fascinación pol brutalismu industrial y por un sistema gravitacional que sigue funcionando, anque en tresformación.