La práctica d’Elisa Cuesta (Sotu’l Barcu, 1992) caltién una atención sostenida escontra los materiales como portadores de conocencia sobre’l territoriu. En Filtrar un mar (2022-2025) parte d’una premisa: imaxinar l’esvanecimientu progresivu de los fluxos minerales qu’alimenten la siderurxa asturiana. El cese del ruiu, del fumu y del tránsitu de materiales daría pasu a procesos metabólicos menos visibles.

Pa materializar esta hipótesis, Cuesta trabaya con barros naturales de Faru, Miranda y l’Altu del Pravianu, xunto a residuos d’acería, mineral de fierro, dunita y calices: materiales procedentes de la historia xeolóxica y industrial asturiana. D’esta investigación surden ventiocho filtros cerámicos únicos suspendíos en trébedes d’aceru diseñaos a midida. Nel espaciu espositivu, les pieces actívense al traviés del vertíu d’agua enturbiao con residuos industriales. Baxo elles, un llechu de celulosa recueye y estratifica’l procesu, produciendo los llamaos estratogrames: cartografíes autónomes y incompletes que faen visible la presencia espectral del legáu tóxicu nel territoriu. Lo que l’agua arrastra; lo que’l barru retién.