Carolina Caycedo (Londres, 1978) ye una artista colombiana afincada en Los Ángeles. La so práctica, enraigonada nel trabayu de campu con comunidaes afectaes pol estractivismu, entiende l’arte como un mediu p’atopase y construyir colectivamente rellaciones de confianza y solidaridá. Investiga les tensiones y posibilidaes de la transición enerxética dende una perspectiva de xusticia ambiental: qué territorios y comunidaes asumen el costu de la descarbonización y qué formes de vida han sostenese nesi procesu.

Our Mineral Intensive Futures (2022) ye un tapiz de formatu grande texíu a partir d’un informe del Bancu Mundial, según el que la estracción de minerales críticos va crecer un 500 % primero del 2050 p’abastecer les tecnoloxíes consideraes «llimpies». Sobre la trama apaecen escenes d’estracción, mapes de xacimientos, piquetes y comunidaes que sostienen la so autonomía y reimaxinen otres formes de vida. La obra plantea la transición non como daqué qu’a cencielles asocede, sinón como una rexeneración construyida activamente en comunidá.