Olmo Cuña (Vigo, 1983) desenvuelve una práctica artística basada n’esperiencies cotidianes y na observación crítica de les formes d’averamientu al territoriu al traviés de la imaxe. fiebre (2026) ye una instalación audiovisual desenvuelta alredor de la Central Térmica d’Aboño, en Carreño, Asturies, una de les últimes centrales de carbón n’activo n’España, anguaño en transición escontra l’hidróxenu verde. El proyectu garra esti territoriu como reflexu d’una situación d’ebullición global. El so títulu alude a distintos tipos de fiebre: la del cuerpu que reacciona énte una infección, la del planeta y les «fiebres» estractivistes que modelaron esti y otros territorios mientres xeneraciones. Nel marcu del programa «Arte por venir» de la Fundación Daniel & Nina Carasso, Cuña articuló un grupu de trabayu con vecines y vecinos d’Aboño, antiguos trabayadores de la industria y axentes locales pa esplorar el procesu de tresformación de la central al traviés de percorríos de campu y talleres de creación audiovisual en supers-8. La instalación axunta les películes producíes —interveníes con técniques analóxiques de viráu y tiñíu— xunto a materiales derivaos del procesu colectivu, como fotografíes y dibuxos.