Víctor Mazón (Santander, 1982) esplora nel so trabayu aquello que de normal permanez fuera de la nuestra percepción: vibraciones, campos electromagnéticos o fenómenos atmosféricos que traviesen la redolada ensin facese visibles. Al traviés del soníu y de dispositivos tecnolóxicos desenvueltos por él mesmu, l’artista investiga cómo escuchar un territoriu y les tresformaciones que lu afecten.

En Fósiles en movimientu (2026), desenvuelta nel marcu de les residencies ACTS (Arte, Ciencia, Tecnoloxía y Sociedá) en collaboración cola Axencia Estatal de Meteoroloxía (AEMET), Mazón parte del fenómenu del global stilling: l’amenorgamientu progresivu de la velocidá del vientu asociada al cambéu climáticu. La obra garra la forma d’una campana eólica de bronce realizada xunto al maestru fundidor Abel Portilla, últimu artesanu campaneru n’activo n’España. A diferencia de les campanes tradicionales, esta nun ye remanada pol ser humanu, sinón namás pol vientu. Instalada na ría d’Avilés, la pieza convierte les variaciones atmosfériques nuna composición sonora cambiante, una especie de «fotografía auditiva» del tiempu. Na Escuela d’Artes y Oficios, una instalación compuesta polos moldes del procesu de fundición de la campana y un paisaxe sonoro grabáu pol artista en plantes eóliques amplía la llectura de la obra y conecta’l tiempu fondu del vientu cola industria de les enerxíes anovables.