Alba Matilla trabaya nuna mestura ente pintura. vidiu, fotometría, escaneáu 3D, vidiuxuegu y instalación. La so investigación sofítase na conservación de la memoria industrial y de les formes nueves de facer pintura nun mundu dixital. Medró ente cacharros que s'usen tolos díes col logotipu de la siderurxa familiar y entiende los paisaxes industriales asturianos como territorios identitarios, cargaos de maxa y simbolismu, que son quien a xenerar mitu propiu.

Dientro del so proyeutu d'investigación desendolcáu en residencia na Factoría Cultural d'Avilés y dientro'l marcu de les residencies ACTS de la Bienal, Matilla presenta tres obres na Bienal Climática: Borrina'l Güercu, Güercu y La Cabadera (2026), tres pieces nes que cada llenzu tien un vidiu y un paisaxe sonoru de resonacies industriales. Les dos primeres faen alcordanza de figures de la mitoloxía asturiana xuníes al mundu los muertos: la borrina que garra al caminante (equí asemeyándola al fumu la fábrica) y la criatura que garra la forma de la persona que morriere hai poco. La tercera ye un inventu d'ella mesma: La Cabadera -criatura que sal d'una charca tóxica nuna escombrera vieya de Tabaza- xurde per aciu del pensamientu de la mitoloxía asturiana como práutica viva, un mou de pensar el presente, dempués de trabayar esa idea nos talleres que se dieron nes escueles dientro'l programa Arte + Educación de la Bienal.